怕內臟的人挑戰新沙洞炒腸

lifestyle
by nicole
16 9 月, 2014

我本身唔食內臟，韓國炒腸 곱창 (小腸) 向來受到不少經常韓遊朋友稱讚，係咁遊說我要試，雖然好美味，尤其好似我咁本身唔食內臟嘅人，如果冇口碑推介真不能亂試，因我都領過野，例如有少少怪味 (心理形住係果D野)，怪口感 (望到腸內有疑似唔應該出現嘅物體), 除非真係煮得好出色，先可以消除個人對「腸」先入為主嘅不良感覺。

有次朋友帶左去新沙洞一間叫 일도씨곱창 嘅炒腸餐廳，位於新沙洞名街林蔭道 가로수길 隔離再隔離一條小路上，單睇外觀其貌不揚內裡裝修簡單，全店只得十零張枱，但晚飯時間去到見門外要排隊等位，已經知係好野，韓國餐廳太多，平時好少何見要排隊嘅餐廳，排得多數冇死。

通常炒腸舖店員都係阿豬媽，不過呢間個個職員都係後生仔後生女，男店員身型樣貌都唔錯，所以顧客亦多數係年輕男女。

呢度除左炒腸곱창，仲有炒辣雞달갈비，仲可以加配料血腸、芝士、年糕、磨菇、甜薯、粉絲、拉面等等一齊炒。因在門口等左一輪，入到去時已餓鬼一樣，無奈D伴菜酸酸地愈食愈肚餓 =_=

最初放晒D料落去時都幾多汁下，店員間唔時過黎幫你撩兩撩D腸，終於等到D腸半熟，D汁開始收水，但距離隔離枱完全收水狀似乎仲有漫長道路，望住有得睇冇得食好痛苦，心急嘅港人梗係會忍唔住自己炒兩炒希望快D有得食，此時男店員即刻撲過黎阻止我地自己炒，嘰哩咕咯一輪話我地手勢唔正確，會炒得難食唔好搞亂檔，堅持由佢地自己炒。而見佢炒嘅手法的確好似亂中帶點步驟，令每舊肉都均云被染成橙色，唔係亂咁兜。臨尾將所有肉同菜堆埋o係中間，熄火，禮成! 由最初一大鑊野炒到最尾得番一隻碟咁上下份量，擺到靚靚咁，充滿藝術感，即時諗起 isaac早餐店阿豬媽整三文治果個認真嘅過程。

經歷漫長等待後終於有得食，D腸因為被剪成一塊塊，已經唔係原本腸咁圓桶形，好在望落個樣已經腸不成腸，先令我呢D向來鄙視內贓嘅人放下戒心。腸肉每個位置都黐滿辣汁，遞埋咀邊時，完全聞唔到不良氣味，已衝破心理關口，咬落，咦? 我係咪咬緊腸架????? 有d爽口，我以為自己食緊西蘭花炒花枝片果d花枝片嘅口感。炒野配上芝麻葉甘香味特別夾，辣道比普通辣再多少少，但又剛剛好未到好辣果個程度，原來炒腸可以咁好食...........呢間值得推介。
炒腸除左可以就咁食，仲可以用菜葉包，或者用圓形果塊酸蘿蔔包住黎食都好好味 (尤其是唔食得辣人士可以酸蘿蔔減底辣味)

食到咁上下，放埋血腸순대落去一齊炒

食到尾，韓人習慣唔好浪費黐o係鑊度果少少汁，加個白飯紫菜韮菜落去炒埋佢，白飯盡吸所有精華。

由於一枱只得一爐，冇得炒辣雞，所以店員預先替我們炒好用碟上，醬汁好味但d雞肉有點雪藏味，還是去番正宗炒辣雞舖會好食d。

我地一行4人有男有女，4人當中仲要有兩人屬大食人士 (我係其中一個 >__< )，最尾大家都食到腹大便便，結果太飽食唔晒D炒飯有剩。總叫左野菜炒腸2人份 (20000won)，炒辣雞2人份 (20000won)，血腸同粉絲做配料 (4500won)，臨尾加兩個炒飯 (4000won)，平均每人12000won，即係 $100有找，晚市喎............ 再次慨歎韓國食野真係好平..........

menu，位於江南區新沙洞呢個物價高地方，食到飽飽 $100 有找好滿足