有關訂香港至首爾機票的經驗小分享 2014版

最近愈來愈多朋友鍾意去韓國玩,所以好多人會問點樣買到平機票,咁就不如開個post 分享我自己訂票的經驗啦!

搖搖我平時雖然係隻大懶鬼,但係一關乎訂機票、酒店等等,我就摩打上身,死搵到至抵為止。(最經典一次莫過於以HK$3500 機票錢,玩勻台北、東京、沖繩。其實我都有諗過轉行去做travel agent =P )

喺度亦提到一點,想買平機票,首要任務就係格價,格價再格價,懶係同貴成正比架!(錢可能無吸引力,不過慳錢就唔同咁講啦!)

(天空雖然好靚, 不過搭飛機都係我一個字形容, 悶.......)

基本搭飛機除咗坐商務,我唔覺得會有E class 係會有享受嘅感覺;
(喺度澄清一點,我每次商務都係剛好有upgrade 咋)
所以若然真係忍受唔到,大家都係乖乖地多付錢坐國泰、大韓、韓亞等大型航空公司啦~

講咗咁多開場白,係時候進入正題.........
第一步我會先check 以下三個大型網上機票網:

· 萬福旅行社 : http://www.ticket.com.hk/ED/bookAir.do?method=query

我自己未訂過呢間,不過就有朋友試過。以我知係只收現金或過數,員工服務態度就一般,但係價錢普遍比出面平,尤其會有二人或者四人成行優惠價!

· Priceline : http://travel.priceline.com.hk/chi/retailair/select.aspx

· Zuji : http://www.zuji.com.hk/

Priceline 同 Zuji 我都試過,兩間都可以直接網上訂票確定,可能同航空公司有簽contract 關係,所以有時呢間航空公司喺Priceline 買平啲, 而嗰間航空公司就係Zuji 買抵啲,最緊要check 清楚先好訂呀!

check 完呢幾個網站,大概揀咗幾間心水航空公司,我就會直接上佢地嘅官方網站,再格下價,有時同航空公司直接訂,真係會平過同agent 訂架!

係度再分析下幾間平價直航之選啦~

· HK Express : 香港的廉價航空,所謂廉空,就係機票以低價發售,不過舒適度認真一般過一般,而且行李寄運和飛機餐係需另外收費,所以唔好見平就急急腳買啦,計好數再compare 下,先知係咪真係最抵。

· Ethiopian Airline : 謎一般的航空公司,係最近新開航段,雖然感覺奇奇怪怪,不過係夜機去夜機返,而個價錢唔算貴,唯一問題並唔係日日有機,所以一定要check 清楚航班。

· Jeju Airline & Jin Air : 兩間都係午機去早機返,價錢相對平,不過實在忍受唔到回程個日要五、六點起身去機場,所以一直無搭過........
(最近Jeju 推出凌晨機來回,不過有種搵命博的感覺 =_=)

· Air India : 中價位亦係個人幾prefer 嘅選擇,皆因可以早機去,午機返,但係傳聞呢間航空公司的飛機都會有陣味,搖搖就未試過,答唔到大家,不過搖媽就親身坐過,佢就話無咩問題。

另外要留意一點,呢間都唔係日日有機架!

最後提提大家,想買平價飛,的確要花時間check 實網站, 有時見平又啱心水就快啲落手,唔好猶豫啦!
(當初我的日本之旅就係咁飲恨 T_T )
我的經驗分享就係咁多囉~

真心希望呢小小分享可以幫到大家啦!
Have fun and enjoy your trip ^^

**********************************************
搖搖將會到韓國讀書,到時候就可以分享更多當地資訊給大家。
有興趣可以follow我的facebook ^^
www.facebook.com/yoyotravelkorea

advertisement