關於韓國男人(5):男朋友們的怪行

210564_2

前幾天,跟幾位「駐韓」的香港吃飯飲野lady's talk。我們做了統計,在apps上認識到的,拍拖拍得一兩個月,有七成都會奇奇怪,我們綜合了怪況如下:

(一)玩失蹤
好好地,無啦啦唔見左人,完全失去聯絡。兩星期後,又突然出現。佢可能會解釋,「我唔見左電話」、「我入左醫院」、「我每日OT」諸如此類。其實,咁即係代表,佢心中冇你囉,咁仲唔明?人地見無聊冇野做,先紆尊降貴搵下你咋。

(二)借錢
認識不久的韓國男問香港女借錢,阿妙最少聽過五個case。找卡數、有事、交學費、交租、買車、隻狗睇醫生、阿婆入醫院,可唔可以借住來先。數量唔多,每次借幾千,但個個月係咁借就變幾萬,女人們因為唔想冇左個男,通常「算啦,借啦」。請諗深一層,而家唔係問你借錢做生意幾百萬上落喎,而係窮到冇錢開飯要問你借一千幾百o既男人,值唔值得呢?

順帶一提,借左出去o既錢就唔好諗住拎得返,你人在香港,韓文又唔識多句,點拎?除非事先寫了借據,借據上需要有對方的姓名、住民登錄號碼、手提電話等資料及蓋章簽名,並要keep 低你匯款到韓國銀行的證明。這樣的話,可以報警處理。

(三)唔覆kakao/line/message
這是(有或是所有男人?)的通病,鍾意就狂打比你、日日message你到凌晨。但又會無啦啦唔搵你唔覆message,又或你send 十個他才回你一個,女人們往往會心思思,完全佔下風。

(四)原來係有老婆或女
有message 要掩住來睇,有電話來要行開先接,成日話見面又甩底,大時大節星期六日通常都消失,星期一至五先會同你約會。你漸漸會發現,其實佢係有女/老婆的。

(五)得個講
常見於,剛剛上網識/交往無耐,你人在香港,聽見你話來韓國探佢,佢會話「我屋企有吉房喎過來住丫」,到你真係上飛機喇,佢先話「下,你真係來架?我屋企唔得呀,你住酒店啦」。又或,原本message flirt 得好好地,聽見你要來韓國搵佢,約埋時間及見面地點諗住可以一見,但卻到當日又失去聯絡。

(六)當你係白痴
當外國人係白痴咁,冇讀過大學卻同你講「(全國第一的)首爾大學收左我架喇,我嫌遠唔讀咋嘛」,將近四十歲人得o個150 萬(hkd10000) 人工同你講「三星原本請我,我覺得錢太少所以唔做咋嘛」……講大話都講得聰明d丫…

(七)突然互不來往
跟第(一)點玩失蹤後再出現不同,這一項是,他完全消失。之前還是好好地在約會、明明每晚說對你說「我愛你」,又或未開始交往但傾得好好地,突然有一天,不再跟你聯絡,也不回覆,從此消失在你的世界,你再找不到他。

(八)唔helpful
的其中一個功能,是為你分憂解困。可能因為語言不通的關係,有些韓國男有很多藉口唔幫女分憂,無論係行動上還是精神上。當你生活、工作有煩惱想同佢地講,講唔夠兩句佢地就唔想聽話要訓聽日早返工;又或你睇唔明韓國網頁想佢幫手打電話去問,佢地會話好忙、好睏、唔識、唔知……

(九)自私
其他野自私其實都算,但有不少韓國長輩都唔接受外國人媳婦的情況下,男卻同你講「我父母唔會接受外國人,所以冇可能同你結婚,雖然我地冇將來…但我就係想同你一齊」,嘩好韓劇呀,但即係點?係咪到你結婚後我要做你情婦?簡直係浪費女人寶貴的青春!

--------------------------

阿妙講左咁多篇「關於韓男」系列,無非都係想提醒大家,小心,不要被韓劇洗腦了,之中也要保持理性啊。

如果以上情況超過三項發生在你男的身上,無論他是不是韓國人,都係時候,醒一醒了。

歡迎瀏覽阿妙的Facebook「阿妙韓國食記」,每日update啊!!