想溝韓仔？請先閱讀這篇「關於韓國男人（１）」
一年多前，阿妙來到韓國，其中一個最重要的目的是，想找個男人結婚生仔！～ｈａｈａｈａ～～但一年過去了，發現其實韓國男人並不很好，最多只是外表身型比較突出而已。然而，因為被韓劇長期薰陶的關係，不少香港女生都夢想自己可以嫁過來韓國，並透過網上、手機apps識韓仔。今日阿妙想講下，韓國男人的一些特質，讓大家在發展感情時，可以了解這些文化差異，小心交友。
韓國男人的特質：
1.乜都要快，相識、互相了解、表白、拖手，佢地都想盡量用最短時間去完成。於是，很多時，相識當日已經會問你「不如做我女朋友」，拍拖一兩日就會問你「不如我地去Motel 好唔好」。無論他們是好人還是壞人，性格本身也是如此急進。
2.行為好突然，不能用常理去理解。他們可以，昨天還是好地地的，今天同你say goodbye 話唔鍾意你；原本每日都講電話，突然有一日玩失蹤，完全唔打比你唔覆message，幾星期之後又會突然出現當乜事都冇發生過；今日鍾意哩個，總日突然唔鍾意，之類。
3.很進取，他們明白，想得到就要自己爭取，鍾意就去追求，所以如果他們對你有意思，攻勢可以是非常煩、強勁、令人招架不住的。他們不介意用任何方式去識女仔，所以網上搵女朋友非常普遍，這也是為何咁多港女台女都有個韓國男朋友的原因。
4.有很多韓國朋友都講過，有好一部份的韓國男人的思考方式，是「先上床後交往」。所以識幾日就要求發生關係這情況是相當普遍的（就連有朋友到慶熙學韓文，第一堂老師就這樣提醒各位女同學！）。
5.當你以為，佢帶你見阿媽，帶你見朋友，就等於肯定你女朋友的地位，那就錯了！在我所認識的朋友當中，見晒佢所有屋企人好朋友，不到幾個月話分手就分手的為數亦不少。只有當這個男人在中秋、新年或者係阿爺擺八十大壽時帶你出席介紹比人識，先真正視你為結婚對象。
6.真正非常大男人、會打女人的那種韓男，不常見，但骨子裏他們還是有點大男人的，例如，他們喜歡老婆留在家洗衫煮飯湊仔，不要求老婆出去搵野做，食飯唔使女朋友比錢，會花錢買禮物比女朋友，這是因為，他們覺得「我係一個男人，唔使女人做哩ｄ野」。對我地女生來講，幾好丫～ｈａｈａ～（所以真係好多嫁過來的港台女性自此成為少奶奶，越南新娘嫁比農村韓男ｏ個ｄ除外）
7.韓國男人如果到３５歲都冇拍拖、未結婚，係會被歧視的。首先大家會覺得佢地有問題所以先搵唔到老婆，其次在公司，上司會覺得佢地冇自己ｏ既家庭即係能力有問題，升職都會升個有家室ｏ既男人先。
8.韓國女人，最不喜歡獨子和長子，因為他們一般在結婚之後都要跟父母同住，大時大節又要幫手煮野食祭祀一腳踢等等。
9.他們絕大部份喜歡食煙同飲酒，十幾廿度的燒酒佢地會成打成打咁飲，亦鍾意同朋友、同事「會食」飲酒吹水。哩兩樣野都係阿妙最憎～ｈａｈａ～
10.韓男一般都係工作好忙，朝九晚七、八，放工仲要同上司同事飲酒，周末又可能太累全日睡眠，有好多籍口唔理個女朋友。
11,正常的韓男，都會揀韓國女人做女朋友／老婆，因為佢地唔識英文，亦好驚講英文。所以，如果真係好想嫁來韓國，就先要學好韓文。又或，去外國讀書識個會講英文的韓仔，這樣會比較容易開花結果。
12.韓男會聽父母話，父母唔鍾意ｏ個個女仔，就一定冇得入門。而大部份的長輩，都唔會想自己個仔娶外國人。因為佢地思想真係好排外，除非個仔又或父母係外國讀書，又或個仔條件好差搵唔到韓國女朋友，思想先會開放ｄ。
13.可能都係因為大男人的關係，韓男成日覺得自己係最勁，見識最多，而你係一定係蠢過佢。所以，佢地不容易會聽別人的意見。
14.好多韓國人，到三十幾四十歲都未去過外國旅行的，國際視野比香港人窄。
15.由於在韓國，讀大學及買車，都是大部份人都做到的事，如果那男人，冇讀過大學又買唔起車，咁即係佢係社會上的少數，要考慮搏唔搏得過。這樣並不是拜金，而是，讀大學同有車，對於在韓國社會上生存真係好必需，佢連自己都搞唔掂的話點會理到你？
－完－
想找韓國男朋友，以上是大家需要有心理準備去面對的文化差異。並不是個個韓國男人都係玄彬宋承憲東方神起同super junior 呢~ｈａｈａ~不過阿妙相信，只要有夢想，凡事可成真，好男人還是有很多的啊～
（另，由於之前有位港韓混血韓男睇完我ｄ文章大發雷霆，用韓文粗口問候我，所以阿妙在此亦要強調，此乃我個人的所見所聞及小小意見，志在提醒女士們小心交友為上。不喜勿插，感謝啊！）
韓劇講o個d高大威猛情深款款男主角……都係呃人架…嗚嗚…ㅠㅠ
