advertisement

食泡麵不求人!韓國漢江便利店泡麵機

去到韓國想食泡麵,又唔一定要拎個煲出嚟煮嘅,喺漢江就有一間便利店俾你自己煮泡麵~煮完個麵仲可以一邊食一邊行下漢江,十分寫意。

位於韓國首爾漢江邊嘅一間便利商店,販賣各式各樣嘅泡麵,還提供「煮泡麵機」等你可以即買即煮。將選購好嘅泡麵同生雞蛋端到位於店外嘅泡麵機前,就可以開始煮泡麵啦。

驟眼看會以為呢部泡麵機只係普通嘅熱水機,其實內有乾坤!呢部機唔單止可以出熱水,下面仲有一個電磁爐可以將泡麵煮滾。

首先喺紙盒中放入泡麵及調味料後,可以靠紙盒上的條碼,對準掃描器,就能啟動機器。上面一共有3個按鍵,分別係紅色(開始鍵)、藍色(加水量)、綠色(加時間),機器會花30秒加水,再用3分鐘煮泡麵,大約一分半就會水就開始滾喇,呢個時候就可以加雞蛋,當螢幕嘅數字歸零,就表示泡麵已經煮好喇,可以開餐~

相片來源:bloom.ss、he_e_jj、j_chaeny、lila_jjung、sojinii_2、ssoo0__、yummmyumm @Instagram