「南朋友」都變男朋友!李聖經的「姊姊」魅力究竟喺邊度?

圖片來源:互聯網、INSTAGRAM

要數這幾天最觸動大家的韓流新聞,相信非「福珠」同「俊亨」的假戲真做吧!本身份屬好友的「南朋友」與「姊姊」究竟係點樣撻著小編唔知,淨係知即使年齡上係位大「姊姊」,但都有好多吸引弟弟嘅魅力!你都想拍場姊弟戀?不妒參考參考下啦!

 

低調小性感

咪以為身材好嘅Model「姊姊」就一定玩火辣睡衣Look;一件淨色背心,頭上仲夾住個家用髮卷,可愛模樣毫無距離感,反而先叫人精神為之一振!

 

簡約打扮

雖然有話兩口子拍拖時喬妝又易容,但見「姊姊」平時同朋友相聚都係淡妝同打扮簡單,感覺清新又貼地,已經足以令人期待同佢去街街嘅時光啦!

 

 

認真工作

做得Model同明星,一定貪靚架啦!但「姊姊」為咗套劇又剪短髮又增肥,態度專業又敬業。要知道,女人認真的樣子其實都好鬼吸引人架!

 

個性開朗

有Follow開「姊姊」IG或者綜藝或者韓劇嘅,都知佢性格開朗愛搞怪,相處起來何止冇年齡差距,更毫無壓力,咁輕鬆自由,中晒戀愛法則啦!

 

又靚又型

老土都係真,「窈窕淑女、君子好求」,而且「南朋友」仲係Model出身,要求點都有返咁上下吧!咁「姊姊」唔只樣靚,身型又高挑,擺起Pose上嚟仲好鬼有型,絕對合晒心水。